არ უნდა დაგვავიწყდეს, რომ ეს ცვლილება, არის იმ ახალგაზრდების დამსახურება, რომლებიც ახლა დგანან რუსთაველზე, წვიმაში, ქარში და ა.შ

ეს განცხადება "გირჩის" ერთ-ერთმა ლიდერმა იაგო ხვიჩიამ გააკეთა პროპორციულ საარჩევნო სისტემაზე გადასვლასთან დაკავშირებით გამართულ შეხვედრაზე, "შერატონ მეტეხი პალასში". შეხვედრას პოლიტიკური პარტიები და არასამთავრობო სექტორის წარმომადგენლები ესწრებოდნენ.

გირჩის ლიდერმა შეხვედრაზე დადებითად შეაფასა პროპორციულ სისტემაზე გადასვლა, მან დასვა შეკითხვა თუ რატომ არის ეს ცვლილება გათვალისწინებული მხოლოდ 2020-თვის და რატომ არ შენარჩუნდება ბუნებრივი ბარიერი მომავალში: 

"მეც და ჩემი პარტიაც მომხრე ვიყავით ამ ცვლილების, მხარს ვუჭერთ ამ ცვლილებას და ჩემი აზრით, ეს არის შანსი ამ ქვეყანაში მართლა დაიწყოს პოლიტიკის კეთება, ასევე შანსი იმისთვის, რომ ახალგაზრდებმა მოიხედონ პოლიტიკისკენ და ჩვენ გამოვცვალოთ ბოლო 30 წლის განმავლობაში ფაქტობრივად უცვლელი და ხელუხლებელი პოლიტიკური სპექტრი.

თუ ყველანი ვთანხმდებით იმაზე, რომ ეს კარგი სისტემაა, მხოლოდ 2020 წლისთვის რატოა კარგი და იგივენაირად კარგი რატომ არ არის შემდეგისთვის? მინდა, რომ ყველასთვის იყოს გასაგები, ის პასუხისმგებლობის გრძნობა, რომელიც ყველას გვაქვს, ვინც ამ პროცესში რამე ფორმით ვმონაწილეობთ, ეს არის ალბათ ერთ-ერთი ბოლო შანსი, როცა ამ ცვლილებას გავიტანთ კონსტიტუციაში, მთლიანად ქართული საზოგადოება. თუ ყველანი ვართ შეთანხმებული იმაზე, რომ ეს კარგია, რატომ არ ვტოვებთ ამ ცვლილებას კონსტიტუციაში სამუდამოდ?

ირაკლი კობახიძემ ხვიჩიას პასუხად, აღნიშნა, რომ კონსტიტუციის ძირითად დებულებებს არ შეხებიან ცვლილებებისას და ეს იქნება მხოლოდ ერთჯერადი რეგულაცია, რაც მრავალფეროვან პოლიტიკურ ძალებს მისცემს საშუალებას ჩაერთონ სახელმწიფოს მართვის პროცესში. 

ამ ერთჯერად რეგულაციას, აქვს თავისი მიზეზი, დღეს გვაქვს ჩვენ განსაკუთრებული გამოწვევა, ეს არის ჩვენი, არა მარტო პოლიტიკური სისტემის, არამედ საზოგადების გამოწვევა, მაქსიმალურად უნდა გაიხსნას სახელმწიფოს მართვის პროცესი სხვადასხვა პოლიტიკური სუბიექტებისთვის,შემდეგი ხუთი წლის განმავლობაში უზრუნველყოფილი იქნება მაქსიმალურად ფართო კონსენსუსი, თუმცა გრძელვადიან პერსპექტივაში ვფიქრობთ საჭიროა მინიმალური ბალანსის დაცვა პლურალიზმსა და სტაბილირობას შორის.

როგორც პარლამენტის ყოფილი თავმჯდომარე ამბობს,  მინიმალური 5 პროცენტიანი ბარიერი ლოგიკასთან ყველაზე ახლოს მდგომი სისტემაა და ევროკავშირის ქვეყნების გამოცდილებაც ამას აჩვენებს, მისი თქმით, ზოგიერთ ევროპულ ქვეყანაში, პროპორციული არჩევნების პირობებში ძალიან გართულდა მთავრობის ჩამოყალიბება, მრავალფეროვანი პოლიტიკური სპექტრის გამო და ესეც ერთგვარი გამოწვევაა ამ სისტემის.

იაგო ხვიჩიას მე-2 შეკითხვა ასაკობრივი ზღვარის დაწევას შეეხებოდა. "გირჩის" ლიდერის თქმით, ეს მიღწევა ხელისუფლების მხრიდან წყალობა კი არა, იმ ახალგაზრდების ბრძოლის შედეგია, რომლებიც ახლა რუსთაველზე დგანან და მათი დიდი ნაწილი საარჩევნო ასაკისაც არ არის, 

მათი დიდი ნაწილი საერთოდ არ არის საარჩევნო ასაკის, ანუ 18 წლისაც არ არის. ხომ არ არის ის ვარიანტი, რომ ამ მიმართულებითაც წავიდეთ და დავწიოთ ასაკობრივი ზღვარი, რომ გასაგები იყოს იმ ადამიანების ხმა, რომლებმაც ფაქტობრივად მოგვიტანეს ის ცვლილება რასაც ახლა ვიხილავთ.

ხვიჩიას ეს შეკითხვა, ყურადღების მიღმა აღმოჩნდა, რადგან მასზე პასუხი ხელისუფლების წარმომადგენლებს არ გაუციათ.