უკვე გაცემულია 0
განკუთვნილია 5 000 000 000
ჩვენ შესახებ
ივლ 26, 2019 ჩვენ შესახებ

გირჩის შესახებ

გირჩი მეტი თავისუფლების, ძალადობის დაუშვებლობისა და მცირე მთავრობის იდეების გარშემო უყრის თავს განსხვავებული ინტერესებისა და შესაძლებლობების მქონე ადამიანებს. ორგანიზაციად 2015 წლის ნოემბერში ჩამოვყალიბდით, მას მერე, რაც ოთხმა დეპუტატმა – ზურაბ გირჩი ჯაფარიძემ, გოგა ხაჩიძემ, პავლე კუბლაშვილმა და გიორგი მელაძემ – ახალი პოლიტიკური ცენტრი – გირჩი დააარსა.

ნებისმიერ საქმიანობას, რომელთანაც გირჩის სახელი ასოცირდება, საფუძვლად უდევს იმის უპირობო და ღრმა რწმენა, რომ ჩვენი სხეული ჩვენ გვეკუთვნის, რომ ძალადობა ამორალურია და რომ საკუთრება მის მოპოვებაში გახარჯული სიცოცხლეა და, შესაბამისად, ხელშეუხებელია.

გვჯერა, რომ კეთილშობილური მიზნებით ძალადობა არ მართლდება – ადამიანთა შორის მხოლოდ თავისუფალ ნებაზე დამყარებული თანამშრომლობის გვწამს, რადგან მხოლოდ ამ პირობებშია შესაძლებელი მშვიდობიანი და ეკონომიკურად განვითარებული სახელმწიფოს ჩამოყალიბება, სადაც ნებისმიერ ადამიანს ბიუროკრატიისგან დაუბრკოლებლად შეეძლება საკუთარი პოტენციალის მაქსიმალურად გამომჟღავნება.

ვფიქრობთ, რომ ნებაყოფლობით ურთიერთობებში სახელმწიფოს მხოლოდ ძალადობის არსებობა აძლევს ჩარევის უფლებას, რაც მისი ერთადერთი ლეგიტიმური დანიშნულებიდან, ადამიანთა უსაფრთხო თანაცხოვრების უზრუნველყოფიდან, გამომდინარეობს. ჩვენს ხელთ არსებული ნებისმიერი საშუალებით ვცდილობთ, საბჭოთა, ძალაუფლების შენარჩუნებისთვის შექმნილი და ხალხზე უმიზეზოდ მოძალადე მართლმსაჯულების სისტემის ჩამოშლას, რათა თითოეული ადამიანის კეთილდღეობაზე ორიენტირებული და მათთან რეალურად ანგარიშვალდებული სამართლებრივი გარემო დავამკვიდროთ და გამოვრიცხოთ ძალოვანი სტრუქტურების ერთი ადამიანის/პოლიტიკური ჯგუფის ხელში აღმოჩენა.

სამომავლოდ, სახელმწიფო სისტემისგან დამოუკიდებელი, თავისუფალი სკოლის გახსნას ვგეგმავთ, სადაც ბავშვები ძალდატანების გარეშე ისწავლიან იმას, რაც თავად აინტერესებთ და რეალურ ცხოვრებაში გამოადგებათ, სადაც ბავშვებს ინდივიდებად განიხილავენ, მათ აზრს პატივს სცემენ და ითვალისწინებენ.

საკუთრების უფლებას თავისუფლების მოპოვებისა და შენარჩუნების გარანტად  მივიჩნევთ და საქართველოს მოქალაქეებისთვის საბჭოთა პერიოდში წართმეული ქონების დარუნებას ვცდილობთ, ვინაიდან სწორედ საკუთრების ჩამორთმევით დავკარგეთ თავისუფლება. ეს პორტალიც სწორედ ამ მიზნის მიღწევას ემსახურება.

პორტალი

პოლიტიკის ყოველდღიურობაში შემოსატანად და ადამიანების მიმდინარე პროცესებში ინტენსიურად ჩართვის მიზნით შევქმენით მართვის უნიკალური ელექტრონული სისტემა, რომელზე დარეგისტრირებითაც თქვენ ავტომატურად ხდებით გირჩში პოლიტიკური გადაწყვეტილებების მიმღები პირი. პორტალის წევრებს ციფრულ საფულეში ერიცხებათ თავისუფლების მოპოვებაში მათ მიერ გაღებული მატერიალური თუ არამატერიალური კონტრიბუციის ექვივალენტი – გირჩის ციფრული ვალუტა GeD (Georgian Dollar). ყოველი წევრის პოლიტიკური წონა გადაწყვეტილებების მიღებისას სწორედ GeD-ების რაოდენობის მიხედვით განისაზღვრება.

პორტალზე გაწევრიანებით თქვენ შეძლებთ, წვლილი შეიტანოთ, მაგალითად, 2020 წლის საპარლამენტო არჩევნებისთვის გირჩის პარტიული სიის შედგენაში. პოლიტიკოსების რეიტინგი მათთვის გამოცხადებული მხარდაჭერის (GeD-ების რაოდენობის) მიხედვით ფორმირდება და მუდმივად იცვლება. გირჩის პლატფორმის წევრებს ნებისმიერ დროს შეუძლიათ, მხარი დაუჭირონ პოლიტიკოსებს ან უარი თქვან მათ მხარდაჭერაზე.

თქვენ თავადაც შეგიძლიათ, გახდეთ პოლიტიკოსი, გამოიყენოთ ჩვენი პლატფორმა ადამიანებისათვის საკუთარი მიზნებისა და ხედვების გასაცნობად და მოიპოვოთ მათი როგორც პოლიტიკური, ასევე ფინანსური მხარდაჭერა.

ვფიქრობთ, რომ ასეთი მოქნილი მექანიზმის დანერგვა ჩვენი განვითარებისა და ზრდისთვის ძალიან მნიშვნელოვან მომენტს წარმოადგენდა, რადგან პოლიტიკოსების ქმედებებზე მხარდამჭერთა სწრაფი რეაგირების შესაძლებლობა გამჭვირვალე, მოქნილ და ორმხრივად ანგარიშვალდებულ ურთიერთობას აყალიბებს. პორტალი ჩვენი კიდევ ერთი ფუნდამენტური მიზნის, პოლიტიკის საბიუჯეტო დაფინანსებისგან სამუდამოდ ჩამოშორების, მიღწევის საშუალებაა.

პორტალზე პოლიტიკოსობის მსურველმა ნებისმიერმა ადამიანმა იცის, რომ მისი ქმედებები პირდაპირ აისახება მიღებულ პოლიტიკურ თუ ფინანსურ მხარდაჭერაზე რაც, თავის მხრივ, პორტალის წევრებს უგზავნის მკაფიო მესიჯს, რომ მათ გადაწყვეტილებებს რეალური და მყისიერი შედეგები მოყვება. 
სამომავლოდ, როდესაც საზოგადოებაში იარსებებს საბჭოთა პერიოდში წართმეული საკუთრების კანონიერი მესაკუთრეებისთვის, საქართველოს მოქალაქეებისათვის, დაბრუნების ნება, GeD-ს საპრივატიზაციო ვალუტის ფუნქციაც შეემატება. ვფიქრობთ, რომ წართმეული ქონების რესტიტუცია არსებული მძიმე ეკონომიკური და სოციალური  მდგომარეობიდან გამოსვლის ერთადერთი  ეფექტური და სამართლიანი გზაა.

გირჩის პორტალზე თქვენ ყოველდღიურ სიახლეებსაც გაეცნობით და გაიგებთ გირჩის შეფასებებს ქვეყანაში მიმდინარე მოვლენებთან დაკავშირებით.

ჩვენი მიღწევები

გირჩის საქმიანობის პროფილის დასახასიათებლად რომელიმე ორგანიზაციული სტატუსის შერჩევა რთულია. ჩვენი მიზნების მისაღწევად სხვადასხვაგვარ საქმიანობაში მოგვიწია ჩართვა. წარმატებულად ვთვლით ნებისმიერ პროექტს, რომელიც ყოველდღიურად გვეხმარება მეტი თავისუფლების მოპოვებაში და გვაძლევს საკუთარი ცხოვრების საკუთარი პასუხისმგებლობით წარმართვის შესაძლებლობას.

ასეთებია მაგალითად:

ბიბლიური თავისუფლება


ბიბლიური თავისუფლება - დაარსების დღიდან მოვითხოვთ სავალდებულო სამხედრო (საყარაულო) სამსახურის გაუქმებას და საკონტრაქტო სისტემაზე გადასვლას, რადგან სახელმწიფოს ხელში არსებული იძულების ეს მექანიზმი ჩვენთვის მონობის შენიღბული გამოხატულებაა და სრულად ამორალურად მიგვაჩნია, სამწუხაროდ, ჩვენი მოთხოვნის მიმართულებით ქმედითი ნაბიჯები არც წინა და არც ამჟამინდელ ხელისუფლებას გადაუდგამს.

იმისათვის, რომ ახალგაზრდებს სავალდებულო სამხედრო სამსახურისგან თავის არიდებაში დავხმარებოდით, ბევრი ფიქრის შემდეგ, კანონმდებლობაში აღმოვაჩინეთ ჩანაწერი, რომლის მიხედვითაც სასულიერო პირები სარგებლობენ სავალდებულო სამხედრო სამსახურის გადავადების უფლებით, და 2017 წლის მარტში დავაარსეთ საქართველოს ქრისტიანული ევანგელისტური პროტესტანტული ეკლესია ‘ბიბლიური თავისუფლება’. ბიბლიური თავისუფლების მიერ გაცემული ‘მღვდელთმსახურის’ მოწმობები ახალგაზრდებს აძლევს სავალდებულო სამხედრო სამსახურის გადავადებისა და ცხოვრების საკუთარი ფასეულობებისა და მიზნების შესაბამისად წარმართვის შესაძლებლობას.

ნარკოპოლიტიკა და კანაფის ლეგალიზაცია - საბჭოთა კავშირისგან დანატოვარი ძალადობრივი ნარკოპოლიტიკა, რომელიც დღემდე ატერორებს და დევნის ადამიანებს ქმედებისთვის, რომელსაც დაზარალებულიც კი არ ჰყავს, პრინციპულად ეწინააღმდეგება ჩვენს რწმენას, რომ ჩვენი სხეული ჩვენ გვეკუთვნის და არავის აქვს უფლება, გვიკარნახოს, თუ როგორ შეგვიძლია ან არ შეგვიძლია, მას მოვეპყროთ. ამ აზრის გავრცელებას ისახავს მიზნად ჩვენს მიერ ამ კუთხით გაწეული საქმიანობაც. 
თავდაპირველად, 2016 წელს, მთავრობას წავუყენეთ ულტიმატუმი - შეეცვალა არსებული არაჰუმანური კანონმდებლობა, წინააღმდეგ შემთხვევაში, ახალი წლის ღამეს ოფისის ტერიტორიაზე კანაფის თესლებს დავთესავდით და ამგვარად გამოვხატავდით სამოქალაქო დაუმორჩილებლობას.  ჩვენი მოთხოვნა – არა, დანაპირები კი შესრულდა. ხელისუფლებამ პარტიის სრული შემადგენლობის მიმართ სისხლის სამართლებრივი დევნის დაწყება ვერ გარისკა, რამაც შედეგად შესაბამისი კანონმდებლობის აღსრულებაზე დეფაქტო მორატორიუმი  გამოიწვია და ადამიანების აქტიური დევნა შეწყდა.

შემდგომ საკონსტიტუციო სასამართლოს მივმართეთ, რომელმაც 2017 წლის 30 ნოემბერს დააკმაყოფილა ჩვენი საკონსტიტუციური სარჩელი, რომლითაც კანაფის პირადი მოხმარებისთვის სისხლისსამართლებრივი პასუხისმგებლობის დაკისრების არაკონსტიტუციურად ცნობას ვითხოვდით. 2018 წელს კი იმავე ქმედებისთვის ადმინისტრაციული პასუხისმგებლობის დაკისრების კონსტიტუციასთან შეუსაბამობაც დადგინდა. სასამართლომ განმარტა, რომ კანაფის პირადი მოხმარება წარმოადგენს ადამიანის თავისუფალი განვითარების უფლების ნაწილს და არ შეიძლება ამისათვის სახელმწიფო ადამიანებს სჯიდეს.
 
აღნიშნული გადაწყვეტილებით საქართველო გახდა პირველი ქვეყანა პოსტსაბჭოთა სივრცეში, სადაც კანაფის მოხმარებისთვის ხალხს აღარ ასამართლებენ. თუმცა, დღემდე არ არსებობს კანაფის კანონიერად მოპოვების გზები და ადამიანებს დღემდე ასამართლებენ ლეგალური ნივთიერების შეძენა/გავრცელებისთვის. შექმნილ აბსურდულ მდგომარეობასთან გამოხმაურების მიზნით 2018 წელს, საპრეზიდენტო არჩევნევამდე ერთი კვირით ადრე, კანაფის ლეგალიზაციის ფესტივალი ჩავატარეთ, სადაც ზურაბ გირჩი ჯაფარიძემ მსურველებს პირდაპირ ეთერში, გადასცა გამზადებული შეკეთებული 'ჯოინთები', რაც არსებული კანონმდებლობით სისხლის სამართლის დანაშაულია, თუმცა, ამ დრომდე შესაბამისი რეაგირება და დევნა არ განხორციელებულა.

Shmaxi


შმAXI - როდესაც თბილისის მერიამ ტაქსების ახალი რეგულაციით ადამიანების დიდ ნაწილს შემოსავლის ერთადერთი წყარო წაართვაა და საზოგადოებას განუსაზღვრა, ამიერიდან რა ფერის და აგებულების მანქანით შეეძლოთ გადაადგილება, კომერციული ორგანიზაციის სახე მივიღეთ და 2019 წლის სექტემბერში, შმAXI დავაარსეთ. რეგულაციის გვერდის ასავლელად, სრულიად კანონიერი გამოსავალი შევთავაზეთ, ერთის მხრივ, ყოფილ ‘ტაქსისტებს’ გამხდარიყვნენ მასწავლებლები (ე.წ. შმაქსისტები), მეორეს მხრივ კი, მგზავრებს გამხდარიყვნენ მოსწავლეები და მგზავრობის ნაცვლად თანხა  ეკონომიკის დარგში ნობელის ლაურეატი მილტონ ფრიდმანის ლექციების მოსმენაში გადაეხადათ.

 

სხვა აქტივობები

როგორც წესი, ჩვენს ყოველდღიურ საქმიანობას ქვეყანაში მიმდინარე მოვლენების შესაბამისად ვგეგმავთ. მაგალითად, როდესაც 2019 წლის მარტში პროსტიტუციისთვის ფართის გადაცემის ბრალდებით სასტუმროების რამდენიმე მეპატრონე დააკავეს, ჩვენს ოფისში საროსკიპო ‘პიონერი’ გავხსენით და სისხლის სამართლის კოდექსის საჯარო დარღვევით მოვთხოვეთ სახელმწიფოს, არ ჩარეულიყო ადამიანების პირად ცხოვრებაში.

dedistraki.com და mamistraki.com ვებ-გვერდებზე რეგულარულად ვტვირთავთ იმ ადამიანების სურათებს და ვინაობას, რომლებიც საჯარო განცხადებებითა და ქმედებებით ცდილობენ, გამოხატვის თავისუფლება შეგვიზღუდონ და საზოგადოებაში კრიტიკული აზრი ჩაახშონ.

Girchi TV

ინტერნეტ სივრციდან ჩვენი იდეების უფრო ფართო მასშტაბებზე გასავრცელებლად 2019 წლის აგვისტოში Girchi TV დავაარსეთ, სადაც შეგიძლიათ, უყუროთ საგანმანათლებლო და შემეცნებით გადაცემებს ჩვენთვის მნიშვნელოვან საკითხებზე და პლატფორმის პოლიტიკოსებიც უკეთ გაიცნოთ ისეთ გადაცემებში, როგორებიცა არის თავისუფალი ბაზარი, გირჩის აზრით, პროცესი, Q&A და სხვა.

ჩვენ მიერ მიღებული ყველა ეს ფორმა არის იარაღი, რათა ყოველდღიურობაში გავატაროთ ის პრინციპები, რისიც გვჯერა და, შესაძლებლობის ზღვარზე, სამოქალაქო დაუმორჩილებლობა გამოვუცხადოთ ყველა იმ კანონს, რომელიც არასამართლიანად მიგვაჩნია, და ამით გავაფართოვოთ პირადად ჩვენი და თქვენი თავისუფლების ფარგლები. ალბათ, ჩვენი არსებობა და გაწეული ძალისხმევა ადასტურებს, თუ რამდენად წარუმატებლად სრულდება სახელმწიფო მხრიდან ადამიანური კრეატივის, თავისუფლებისა და ბედნიერებისკენ სწრაფვის შეზღუდვის ნებისმიერი მცდელობა.